پیٹرول اور ڈیزل سستا ہونےکے بعد گڈز ٹرانسپورٹرز کا کرایوں میں کمی کا اعلان

آل پاکستان گڈز ٹرانسپورٹ اتحاد نے حکومت کی جانب سے پیٹرول اور ڈیزل کی قیمتوں میں کمی کے فیصلے کا خیر مقدم کرتے ہوئے ملک بھر میں گڈز ٹرانسپورٹ کے کرایوں میں فوری طور پر 5 فیصد کمی کا باضابطہ اعلان کر دیا ہے۔

آل پاکستان گڈز ٹرانسپورٹ اتحاد کے صدر ملک شہزاد اعوان نے اپنے جاری کردہ بیان میں کہا کہ گزشتہ چار سے پانچ روز کے دوران پیٹرولیم مصنوعات کی قیمتوں میں ہونے والی کمی کے مثبت اثرات عوام اور تاجر برادری تک منتقل کرنے کے لیے کرایوں میں کمی کا فیصلہ کیا گیا ہے۔ انہوں نے وزیراعظم اور وفاقی وزیرِ پیٹرولیم کا شکریہ ادا کرتے ہوئے مطالبہ کیا کہ صنعتی و ٹرانسپورٹ سیکٹر کو مزید استحکام اور عوام کو ریلیف فراہم کرنے کے لیے پیٹرولیم مصنوعات کے نرخوں میں مزید کمی کی جائے۔

یاد رہے کہ حکومت کی جانب سے پیٹرول کی قیمت میں 9 روپے 41 پیسے فی لیٹر کمی کی گئی ہے، جس کے بعد پیٹرول کی نئی قیمت 352 روپے 59 پیسے فی لیٹر مقرر ہو گئی ہے۔ اسی طرح ہائی اسپیڈ ڈیزل کی قیمت میں بھی 5 روپے 56 پیسے فی لیٹر کمی کی گئی ہے، جس کے بعد ڈیزل کی نئی قیمت 382 روپے 25 پیسے فی لیٹر سطح پر آ گئی ہے۔