جے ڈی وینس کا ایران جنگ ختم کرنے اور اسرائیل سے تعلقات پر نظرثانی کا مطالبہ

امریکا کے نائب صدر جے ڈی وینس نے ایران کے ساتھ جاری جنگ کو فوری طور پر ختم کرنے اور اسرائیل کے ساتھ سفارتی و معاشی تعلقات پر نظرثانی کا نیا مطالبہ کر دیا ہے، جس کے بعد واشنگٹن کے سیاسی حلقوں میں ہلچل مچ گئی ہے۔

امریکی نائب صدر اور صدر ڈونلڈ ٹرمپ کے درمیان کھلے عام سیاسی اختلافات کی خبریں سامنے آنے لگی ہیں۔ جے ڈی وینس نے امریکی انتظامیہ اور ریپبلکن پارٹی پر زور دیا ہے کہ وہ غیر ملکی جنگوں کے بجائے اندرونی مہنگائی اور عام امریکیوں کے معاشی مسائل کے حل پر اپنی مکمل توجہ مرکوز کریں۔

انہوں نے اعتراف کیا کہ ایران جنگ ہی حالیہ مڈ ٹرم انتخابات میں ریپبلکن پارٹی کی شکست کی سب سے بڑی اور بنیادی وجہ بنی، کیونکہ امریکی عوام اب اسرائیل کو ترجیح دینے کی پالیسی سے دلبرداشتہ ہو کر صرف اور صرف امریکی مفادات کو ترجیح دینے کا مطالبہ کر رہے ہیں۔

جے ڈی وینس کا مزید کہنا تھا کہ ریپبلکن انتخابی مہم کے دوران معاشی مسائل پر مؤثر انداز میں بات کرنے میں ناکامی کا سامنا کرنا پڑا اور آئندہ دنوں میں اس شکست کے اسباب پر پارٹی کے اندر مزید شد و مد سے اختلافات سامنے آئیں گے۔ معروف امریکی خبر رساں ویب سائٹ ‘ایگزیوس’ (Axios) کے مطابق نائب صدر جے ڈی وینس کے اس اہم بیانیہ کے بعد انہوں نے صدر ڈونلڈ ٹرمپ کے ساتھ واضح سیاسی فاصلہ بڑھانے کا کھلا اور غیر مبہم تاثر دے دیا ہے