ایران نے سعودیہ اور یمن کے حوثیوں کے جاری تنازع میں ملوث ہونے کے الزامات مسترد کر دیئے

ایرانی وزارتِ خارجہ کے ترجمان اسماعیل بقائی نے یورپی یونین کی خارجہ پالیسی کے سربراہ کے بیانات پر شدید ردِعمل دیتے ہوئے سعودی عرب اور یمن کے حوثیوں کے درمیان جاری تنازع میں ایران کے ملوث ہونے کے تمام الزامات کو قطعی طور پر مسترد کر دیا ہے۔

ترجمان اسماعیل بقائی نے الٹا یورپی یونین پر تنقید کرتے ہوئے الزام عائد کیا کہ وہ یمنی عوام کے خلاف غیر قانونی پابندیوں کی حمایت اور ان کے معاشی محاصرے میں براہِ راست شریک ہے۔ انہوں نے واضح کیا کہ ایران کی جانب سے حوثیوں کو کسی قسم کی فوجی امداد کی فراہم کے الزامات محض ‘جعلی خبریں’ (Fake News) ہیں، جن کا بنیادی مقصد خطے کے حقیقی حقائق کو چھپانا اور عالمی رائے عامہ کو گمراہ کرنا ہے۔

یاد رہے کہ رواں ہفتے یورپی یونین کی خارجہ پالیسی کے سربراہ کی جانب سے جاری کردہ بیان میں سعودی عرب پر حوثیوں کے حملوں اور یمن میں ان کی بڑھتی ہوئی فوجی سرگرمیوں کی شدید مذمت کی گئی تھی۔ اس بیان میں ایران سمیت تمام علاقائی فریقوں سے پرزور مطالبہ کیا گیا تھا کہ وہ حوثیوں کو ہر قسم کی فوجی اور لوجسٹک معاونت فراہم کرنے کا سلسلہ فوری طور پر بند کریں۔