یوکرین کی امریکا سے سٹار شیلڈ سیٹلائٹ کے نئے معاہدے کیلئے فوری مذاکرات کی درخواست

یوکرین اور امریکی حکومت کے درمیان ‘سٹار شیلڈ’ (Starshield) سیٹلائٹ نیٹ ورک کے استعمال کا معاہدہ آئندہ سال ختم ہونے کے پیشِ نظر کیف انتظامیہ نے نئے معاہدے کی توسیع کے لیے واشنگٹن سے فوری مذاکرات شروع کرنے کی باضابطہ درخواست کی ہے۔

واشنگٹن میں یوکرین کے سینئر سفارت کار ڈینس سینیِک (Denys Sienik) کے مطابق موجودہ معاہدے کی مدت 2027 کے وسط میں ختم ہو جائے گی، تاہم جنگی ضروریات کے پیشِ نظر نئے معاہدے پر بات چیت کا ابھی سے آغاز انتہائی ضروری ہے۔ یاد رہے کہ گزشتہ ماہ سٹار شیلڈ سروس کی رفتار میں اچانک کمی اور محدود کیے جانے کے باعث یوکرینی افواج کو روسی ڈرون حملے روکنے میں شدید مشکلات کا سامنا کرنا پڑا، جس کے نتیجے میں کیف کو اپنی متعدد اہم فوجی کارروائیاں منسوخ کرنا پڑیں۔

یوکرین کا کہنا ہے کہ سروس میں آنے والے اس تعطل اور سست روی کے بارے میں نہ تو امریکی حکومت اور نہ ہی ایلون مسک کی کمپنی سپیس ایکس (SpaceX) کی جانب سے کوئی پیشگی اطلاع یا وضاحت فراہم کی گئی۔ یوکرینی حکام کے مطابق انہوں نے پینٹاگون، وائٹ ہاؤس اور سپیس ایکس سے اس معاملے پر باقاعدہ جواب طلب کیا تھا لیکن کوئی تسلی بخش موقف موصول نہیں ہوا۔ اس کے علاوہ کیف کو انٹیلی جنس معلومات کی فراہمی میں تعطل اور پیٹریاٹ و ناسامز (NASAMS) فضائی دفاعی نظام کے میزائلوں کی سپلائی میں تاخیر جیسے مسائل کا بھی سامنا ہے۔ اگرچہ یوکرینی صدر وولودیمیر زیلنسکی نے سپیس ایکس کی تکنیکی خدمات کی تعریف کی ہے، تاہم انہوں نے ایلون مسک کے حالیہ بعض سیاسی بیانات پر سخت تنقید بھی کی ہے۔