بلاول بھٹو زرداری نے وزیراعلیٰ سندھ کے ہمراہ یونیورسٹی آف لاڑکانو کا افتتاح کر دیا

پاکستان پیپلز پارٹی (پی پی پی) کے چیئرمین بلاول بھٹو زرداری نے وزیراعلیٰ سندھ سید مراد علی شاہ کے ہمراہ یونیورسٹی آف لاڑکانو کا باقاعدہ افتتاح کر دیا ہے۔

افتتاح کے موقع پر یونیورسٹی کے وائس چانسلر پروفیسر ڈاکٹر نیک محمد شیخ نے بلاول بھٹو زرداری اور وزیراعلیٰ سندھ کو ادارے کے مختلف تعلیمی شعبوں، ریسرچ سہولیات اور فیکلٹیز سے متعلق تفصیلی بریفنگ دی۔ بعد ازاں چیئرمین پی پی پی نے سوشل سائنسز اینڈ ہیومینیٹیز، انجینئرنگ اینڈ ٹیکنالوجی، ایگریکلچرل سائنسز اور قانون کی فیکلٹیز کا دورہ کیا اور تعلیمی انتظامات کا جائزہ لیا۔

بریفنگ کے دوران بتایا گیا کہ یونیورسٹی آف لاڑکانو کا قیام خطے کے کئی تاریخی تعلیمی اداروں جیسے سندھ یونیورسٹی اور قائدِ عوام یونیورسٹی کے سابق لاڑکانہ کیمپسز، شہید ذوالفقار علی بھٹو زرعی کالج اور شہید محترمہ بینظیر بھٹو لا کالج کو آپس میں ضم کر کے عمل میں لایا گیا ہے۔ یہ یونیورسٹی لاڑکانہ ڈویژن اور بالخصوص پورے سندھ کی تعلیمی، سماجی اور معاشی ترقی میں کلیدی کردار ادا کرے گی۔