سندھ بھر میں اسلحے کی نمائش پر پابندی میں مزید ایک ماہ کی توسیع

حکومتِ سندھ نے صوبے بھر میں امن و امان کی صورتحال کو برقرار رکھنے اور عوام میں تحفظ کے احساس کو یقینی بنانے کے لیے اسلحے کی نمائش پر عائد پابندی میں مزید ایک ماہ کی توسیع کا فیصلہ کیا ہے۔

صوبائی حکومت نے ضابطہ فوجداری کی دفعہ 144 کے تحت پابندی میں توسیع کا باضابطہ نوٹیفکیشن بھی جاری کر دیا ہے، جس کے تحت یہ پابندی یکم نومبر 2026ء سے اگلے ایک ماہ کے لیے نافذ العمل رہے گی۔

نوٹیفکیشن کے مطابق نجی سیکیورٹی کمپنیوں کے گارڈز کو دورانِ ڈیوٹی صرف مقررہ مقامات پر اسلحہ رکھنے کی اجازت ہوگی، تاہم دورانِ سفر گاڑیوں، گشت کے دوران یا کھلی جگہوں پر اسلحے کی نمائش کی سخت ممانعت ہوگی۔ حکومت نے واضح کیا ہے کہ عوام میں خوف یا عدم تحفظ کا احساس پیدا کرنے والی کسی بھی غیر ضروری نمائش کو برداشت نہیں کیا جائے گا۔ دفعہ 144 کی خلاف ورزی کرنے والوں کے خلاف متعلقہ ایس ایچ اوز (SHOs) کو تعزیراتِ پاکستان کی دفعہ 188 کے تحت فوری مقدمات درج کرنے اور قانونی کارروائی کا مکمل اختیار دے دیا گیا ہے۔