پنجاب کے مختلف علاقوں میں گیس کی بندش اور لو پریشر سے شہری پریشان

لاہور سمیت پنجاب کے مختلف علاقوں میں گیس کی غیر اعلانیہ بندش اور لو پریشر کی شدید شکایات کے باعث شہریوں کی روزمرہ زندگی، خصوصاً کھانا پکانے کے امور بری طرح متاثر ہو رہے ہیں۔ صوبائی دارالحکومت کے علاقوں شفیق آباد، بند روڈ، سمن آباد، شالیمار، باغبانپورہ، یتیم خانہ اور مزنگ سمیت کئی مقامات پر سُوئی گیس کی عدم دستیابی کے باعث بچوں کو بغیر ناشتے کے اسکول جانا پڑ رہا ہے۔ شہریوں کا کہنا ہے کہ کھانے کے اوقات میں بھی گیس کا پریشر انتہائی کم یا صفر رہتا ہے، جس کی وجہ سے وہ ایل پی جی سلنڈر اور لکڑیاں جلانے جیسے مہنگے متبادل ذرائع استعمال کرنے پر مجبور ہیں، جس سے گھریلو بجٹ پر اضافی بوجھ پڑ رہا ہے۔ متاثرہ شہریوں نے متعلقہ حکام سے مطالبہ کیا ہے کہ کھانے کے اوقات میں گیس کی بلا تعطل فراہمی اور مناسب پریشر کو فوری طور پر یقینی بنایا جائے۔