سعودیہ کے بعد چین اور کویت کی 4.3 ارب ڈالر قرض رول اوور کی یقین دہانی

سعودی عرب کے بعد چین اور کویت نے بھی پاکستان کو 4.3 ارب ڈالر کا قرض رول اوور کرنے کی یقین دہانی کرا دی ہے، جس کے بعد تینوں دوست ممالک سے مجموعی طور پر 7.3 ارب ڈالر کا قرضہ ایک سال کے لیے مؤخر ہو جائے گا۔ وزارتِ خزانہ کے ذرائع کے مطابق مارچ 2027 میں چین کے 4 ارب ڈالر جبکہ کویت کے 30 کروڑ ڈالر کا قرض رول اوور کیا جائے گا۔ اس سے قبل وفاقی وزیرِ خزانہ سینیٹر محمد اورنگزیب نے تصدیق کی تھی کہ سعودی عرب کا 3 ارب ڈالر کا قرض پہلے ہی رول اوور ہو چکا ہے۔ انہوں نے کہا کہ ملک میں تین ماہ کی درآمدات کے برابر زرمبادلہ ذخائر موجود ہیں اور دسمبر میں آئی ایم ایف سے 1.21 ارب ڈالر کی مزید قسط موصول ہونے کی توقع ہے، جس سے رواں مالی سال کی 21 ارب ڈالر کی بیرونی ادائیگیوں کا دباؤ نمایاں حد تک کم ہو جائے گا۔