اسرائیل کی فلسطینیوں کے ساڑھے 9 ہزار گھر تباہ کرنیکی تیاری، مالکان کو نوٹس جاری

اسرائیلی حکام نے مقبوضہ مغربی کنارے میں فلسطینیوں کی زمینوں پر قبضہ اور جبری بے دخلی کی مہم کو تیز کرتے ہوئے ساڑھے 9 ہزار سے زائد مکانات، دکانوں اور دیگر عمارات کو مسمار کرنے کے لیے نوٹسز جاری کر دیے ہیں، جس کے تحت متعدد عمارتوں کی تعمیر فوری طور پر روک دی گئی ہے اور کئی کو زمین بوس کر دیا گیا ہے۔

فلسطینی کمیشن کی جاری کردہ تفصیلی رپورٹ کے مطابق، 2015ء سے 2025ء کے دوران اسرائیلی حکومت کی جانب سے فلسطینیوں کو اپنے گھروں اور جائیدادوں سے محروم کرنے کی خاطر 9 ہزار 174 باضابطہ نوٹسز جاری کیے گئے۔ رپورٹ میں انکشاف کیا گیا ہے کہ جاریہ سال 2026ء کے دوران مزید 344 مسماری و تعمیری پابندی کے نوٹسز کا اجرا کیا جا چکا ہے۔ اس سلسلے میں سال 2023ء سب سے زیادہ خطرناک رہا، جب صرف ایک سال کے اندر 1 ہزار 333 سے زائد فلسطینی مکانات کو ہدف بنایا گیا۔

رپورٹ میں بتایا گیا ہے کہ الخلیل (Hebron) کا شہر اس مسماری مہم کا سب سے بڑا نشانہ بنا ہے، جہاں 2015ء سے اب تک 2 ہزار 697 عمارتوں کو سرخ نشانات کی زد پر لایا گیا۔ اس کے علاوہ بیت لحم میں 1 ہزار 310 جبکہ رام اللہ اور مقبوضہ بیت المقدس میں بھی سینکڑوں مکانات کے خلاف کارروائیاں جاری ہیں۔ دوسری جانب اقوام متحدہ کے انسانی امور سے متعلق ادارے (OCHA) نے تصدیق کی ہے کہ اسرائیلی افواج اب تک مقبوضہ علاقوں میں مجموعی طور پر لگ بھگ 12 ہزار فلسطینی عمارتوں اور ڈھانچوں کو مسمار کر چکی ہیں