وزیراعظم کی مہمند میں انسداد پولیو ٹیم پر حملے کی مذمت، دہشتگردی کے مکمل خاتمے کا عزم

وزیراعظم محمد شہباز شریف نے خیبر پختونخوا کے ضلع مہمند میں انسدادِ پولیو ٹیم کی سیکورٹی پر مامور پولیس اہلکاروں پر ہونے والے بزدلانہ اور دہشت گردانہ فائرنگ کے واقعے کی شدید ترین الفاظ میں مذمت کی ہے۔

ایک سرکاری بیان میں وزیراعظم محمد شہباز شریف نے واقعے میں جامِ شہادت نوش کرنے والے بہادر پولیس اہلکاروں کو خراجِ عقیدت پیش کرتے ہوئے شہداء کے درجات کی بلندی کے لیے دعا کی اور غمزدہ خاندانوں سے دلی تعزیت و ہمدردی کا اظہار کیا۔

وزیراعظم نے کہا کہ انسدادِ پولیو ورکرز اور ان کی حفاظت پر مامور پولیس و سیکورٹی اہلکار ایک اہم اور مقدس قومی فریضہ سرانجام دے رہے ہیں، جو آنے والی نسلوں کے محفوظ اور صحت مند مستقبل کو یقینی بنانے کے لیے دن رات کوشاں ہیں۔ انہوں نے واضح کیا کہ اس نوعیت کے شقی القلب اور دہشت گردانہ حملے انتہائی افسوسناک اور قابلِ مذمت ہیں۔ وزیراعظم شہباز شریف نے اپنے عزم کا اعادہ کرتے ہوئے کہا کہ حکومت اور سیکورٹی ادارے ملک سے ہر قسم کی دہشت گردی اور انتہا پسندی کے مکمل خاتمے کے لیے پرعزم ہیں اور ایسے شرپسند عناصر کو قانون کے کٹہرے میں لایا جائے گا۔