ڈیموکریٹک امیدوار عبدل السید کا اکثریت ملنے پر امریکی صدر کے احتساب کا اعلان

ریاست مشی گن سے امریکی سینیٹ کے لیے ڈیموکریٹک پارٹی کے امیدوار عبدالسید (Abdul El-Sayed) نے عزم کا اظہار کرتے ہوئے کہا ہے کہ اگر ڈیموکریٹس کو سینیٹ اور ایوانِ نمائندگان میں عددی اکثریت حاصل ہوتی ہے تو وہ صدر ڈونلڈ ٹرمپ کا سخت احتساب کریں گے اور جارحانہ جنگوں کے خاتمے کو اپنی اولین ترجیح بنائیں گے۔

ریاست مشی گن میں وسط مدتی انتخابات کے دوران میڈیا سے گفتگو کرتے ہوئے عبدالسید نے کہا کہ ان کا مقصد صرف امریکی تاریخ کا پہلا مسلمان سینیٹر بننا نہیں، بلکہ وہ مشی گن کے تمام شہریوں کا حقیقی نمائندہ بن کر امریکی سینیٹ میں جانا چاہتے ہیں۔ انہوں نے واضح کیا کہ ان کی انتخابی مہم کا بنیادی مقصد محض کوئی عہدہ یا خطاب حاصل کرنا نہیں بلکہ مشی گن کے عوام کے حقوق اور ان کی آواز کی بہترین نمائندگی کرنا ہے۔

ڈیموکریٹک رہنما نے انتخابات میں اپنی پوزیشن کے حوالے سے انتہائی پرامید ہونے کا اظہار کرتے ہوئے مزید کہا کہ اگرچہ ایک متحرک انتخابی مہم کسی فتح کی حتمی ضمانت نہیں ہوتی اور آخری فیصلہ ووٹرز ہی کا ہوتا ہے، لیکن وہ عوام کی حمایت سے مکمل طور پر مطمئن ہیں۔ انہوں نے کہا کہ کانگریس میں اکثریت حاصل ہوتے ہی وہ عوامی بہبود، معاشی انصاف اور صدر ٹرمپ کی پالیسیوں کے احتساب کے لیے قانون سازی کا آغاز کریں گے۔