این سی سی آئی اے بھرتی: جعلی میڈیکل فٹنس سرٹیفکیٹس فروخت کرنے والا ملزم گرفتار

نیشنل سائبر کرائم انویسٹی گیشن ایجنسی (این سی سی آئی اے) نے ادارے میں بھرتی کے عمل کے دوران امیدواروں کو جعلی میڈیکل فٹنس سرٹیفکیٹس تیار کر کے فراہم کرنے میں ملوث ایک اہم ملزم کو کامیاب کارروائی کے بعد گرفتار کر لیا ہے۔

حکام کے مطابق، گرفتار کیا گیا ملزم حکومتِ سندھ کے محکمہ جنگلات و جنگلی حیات کا ریٹائرڈ ڈپٹی سیکرٹری ہے جو عبداللہ گوٹھ کراچی کے علاقے میں ایک فوٹو اسٹیٹ اور اسٹیشنری کی دکان چلاتا ہے۔ ملزم مبینہ طور پر سرکاری عہدے کا ناجائز فائدہ اٹھاتے ہوئے این سی سی آئی اے کی حالیہ بھرتیوں کے دوران امیدواروں سے بھاری مبالغ لے کر جعلی میڈیکل فٹنس سرٹیفکیٹس اور دیگر سرکاری دستاویزات تیار کر کے فراہم کرنے میں ملوث تھا۔

این سی سی آئی اے حکام نے چھاپے کے دوران برآمد ہونے والے تمام جعلی سرٹیفکیٹس، مہروں اور ڈیجیٹل ڈیوائسز کے ہمراہ گرفتار ملزم کو حتمی تفتیش اور مزید سخت قانونی کارروائی کے لیے متعلقہ تھانے کی پولیس کے حوالے کر دیا ہے، جبکہ جعلی سرٹیفکیٹس حاصل کرنے والے امیدواروں کی بھی چھان بین شروع کر دی گئی ہے۔