چائلڈ پورنوگرافی اور کم عمر بچوں کو بلیک میل کرنے کے الزام میں دو ملزم گرفتار

نیشنل سائبر کرائم انویسٹی گیشن ایجنسی (این سی سی آئی اے) نے راولپنڈی اور اٹک میں کامیاب کارروائیاں کرتے ہوئے چائلڈ پورنوگرافی، آن لائن بلیک میلنگ اور کم عمر بچوں کے جنسی استحصال میں ملوث دو ملزمان کو گرفتار کر لیا ہے۔

ذرائع کے مطابق اٹک میں کی گئی کارروائی کے دوران ایک سرکاری ادارے کے سینیٹری ورکر کو گرفتار کیا گیا، جس نے متعدد کم عمر لڑکوں کے ساتھ غیر اخلاقی حرکات کر کے ان کی ویڈیوز تیار کر رکھی تھیں۔ ابتدائی تفتیش سے معلوم ہوا ہے کہ ملزم آن لائن گیمز کھیلنے والے کم عمر بچوں کو مالی لالچ دے کر اپنے جال میں پھنساتا تھا اور مقروض ہونے والے بچوں کا جنسی استحصال کر کے ان کی ویڈیوز بنا لیتا تھا، جن کے ذریعے بعد میں انہیں بلیک میل کیا جاتا تھا۔ سائبر کرائم ایجنسی نے بلیک میلنگ کا شکار بننے والے پانچ بچوں کی باضابطہ شناخت کر لی ہے، جبکہ ملزم کی جانب سے یہ نازیبا ویڈیوز ڈارک ویب (Dark Web) پر فروخت کیے جانے کے شبے میں بھی وسیع پیمانے پر تحقیقات جاری ہیں۔

دوسری جانب، راولپنڈی میں این سی سی آئی اے نے 14 سالہ لڑکی کو نازیبا ویڈیوز کے ذریعے بلیک میل کرنے والے ایک فعال گروہ کا سراغ لگا کر اسے گرفتار کر لیا ہے۔ ذرائع کا کہنا ہے کہ یہ گروہ کم عمر لڑکوں پر مشتمل تھا، جنہوں نے ’ہیپی موڈ‘ (Happy Mode) کے نام سے ایک واٹس ایپ گروپ بنا رکھا تھا جس کے ذریعے مواد پھیلایا جاتا تھا۔ کارروائی کے دوران دو مرکزی ملزمان کو حراست میں لے کر ان کے قبضے سے موبائل فونز برآمد کر لیے گئے ہیں، جن کا تکنیکی اور فرانزک آڈٹ جاری ہے تاکہ مزید حقائق سامنے لائے جا سکیں۔