بیوی کو آگ لگانے کے الزام میں انٹیلی جنس بیورو کے ملازم کی اپیل خارج

سپریم کورٹ آف پاکستان نے اپنی ہی بیوی پر تشدد اور آگ لگانے کے الزام میں انٹیلی جنس بیورو (آئی بی) کے باورچی جواد عباسی کی جبری ریٹائرمنٹ کا محکمانہ فیصلہ برقرار رکھتے ہوئے ان کی اپیل خارج کر دی ہے۔ جسٹس شاہد وحید کا تحریر کردہ فیصلے میں کہا گیا ہے کہ فوجداری کیس میں بریت محکمانہ کارروائی سے بریت کے لیے کافی نہیں اور سرکاری ملازم کا کردار صرف دفتری فرائض تک محدود نہیں ہوتا بلکہ اس کی نجی زندگی کا کردار بھی محکمانہ احتساب کے دائرے میں آتا ہے۔ تحریری حکم نامے میں واضح کیا گیا کہ گھر کی چار دیواری میں خواتین پر تشدد کو نجی معاملہ قرار نہیں دیا جا سکتا اور خواتین کی عزت و وقار کا تحفظ آئینی ذمہ داری ہے۔ عدالت عالیہ کے مطابق خواتین پر تشدد کرنے والا سرکاری ملازم ادارے کی ساکھ اور عوامی اعتماد کو شدید متاثر کرتا ہے، لہٰذا 2022ء میں اہلیہ کو زندہ جلانے کی کوشش کرنے والے ملزم کی سزا برقرار رہے گی۔