پائیدار ترقی کے لئے پالیسیوں کا تسلسل ناگزیر ہے: وفاقی وزیر احسن اقبال

وفاقی وزیرِ منصوبہ بندی احسن اقبال نے کہا ہے کہ پاکستان اپنی صنعتی و معاشی صلاحیتوں کو مضبوط بنانے اور جدید ٹیکنالوجی سے ہم آہنگ ہونے کے لیے کوشاں ہے، جبکہ پائیدار ترقی کے مقاصد حاصل کرنے کے لیے قومی پالیسیوں کا تسلسل ناگزیر ہے۔ اسلام آباد میں ایس ڈی پی آئی (SDPI) کے زیرِ اہتمام 29 ویں پائیدار ترقی کانفرنس سے خطاب کرتے ہوئے انہوں نے کہا کہ مشرقِ وسطیٰ کے تنازعات اور یوکرین جنگ کے باعث عالمی معیشت، توانائی اور خوراک کی قیمتوں پر شدید اثرات مرتب ہو رہے ہیں جن کا مقابلہ کرنے کے لیے ترقیاتی ترجیحات پر نظرثانی ضروری ہے۔ احسن اقبال نے مزید بتایا کہ حکومت وژن 2025 کے تحت چوتھے صنعتی انقلاب کی تیاری اور جدید ٹیکنالوجی کو قومی حکمتِ عملی کا حصہ بنانے پر کام کر رہی ہے۔