حق سچ کی آواز اٹھانے والے صحافیوں پر ظلم و تشدد بند ہونا چاہیے: مریم نواز

وزیراعلیٰ پنجاب مریم نواز شریف نے صحافیوں کے خلاف جرائم کے خاتمے کے عالمی دن کے موقع پر اپنے پیغام میں کہا ہے کہ حق و سچ کی آواز اٹھانے والے صحافیوں پر ظلم و تشدد کا سلسلہ بند ہونا چاہیے۔ انہوں نے واضح کیا کہ صحافیوں کو بلا خوف و خطر فرائض کی انجام دہی کے لیے محفوظ ماحول کی فراہمی ریاست کی اولیں ذمہ داری ہے کیونکہ آزاد اور ذمہ دار صحافت جمہوریت کے استحکام کی اساس ہے۔ وزیراعلیٰ نے صحافیوں کو دھمکانے اور ہراساں کرنے کے واقعات کو ناقابلِ قبول قرار دیتے ہوئے ملوث عناصر کو قانون کے کٹہرے میں لانے کا اعادہ کیا۔ انہوں نے مزید کہا کہ پنجاب میں صحافی مکمل محفوظ ہیں اور حکومت بے گھر صحافیوں کے لیے اپنی چھت کے خواب کو تعبیر دینے سمیت تمام صحافتی حقوق کے تحفظ کی ضامن ہے۔