مالیاتی نظم و ضبط، برآمدات میں اضافے اور نجی سرمایہ کاری کا فروغ ناگزیر ہے: وزیر خزانہ

وزیرِ خزانہ محمد اورنگزیب نے کہا ہے کہ پاکستان کا سفر معاشی استحکام سے پائیدار ترقی کی جانب جاری ہے، جس کے لیے مالیاتی نظم و ضبط، برآمدات میں اضافہ اور نجی سرمایہ کاری کا فروغ ناگزیر ہے۔ پاکستان بینکس ایسوسی ایشن کی تقریب سے ورچوئل خطاب کرتے ہوئے انہوں نے بتایا کہ گزشتہ مالی سال 41.6 ارب ڈالر کی ترسیلاتِ زر حاصل ہوئیں جو رواں مالی سال 44 ارب ڈالر سے تجاوز کر جائیں گی۔ وزیرِ خزانہ نے واضح کیا کہ ‘ورچوئل اثاثہ جات ایکٹ 2026’ کے تحت ملک میں ڈیجیٹل اثاثوں کے لیے باقاعدہ قانونی فریم ورک قائم کر دیا گیا ہے جبکہ ‘پیوارا’ (PVARA) لائسنسنگ اور نگرانی کی ذمہ دار ہے۔ انہوں نے سٹیٹ بینک اور ایس ای سی پی کے کردار کو سراہتے ہوئے کرپٹو اثاثوں کے خطرات سے نمٹنے اور ڈیجیٹل فنانس میں سائبر سیکیورٹی کو یقینی بنانے پر زور دیا۔