لاہور ہائیکورٹ کا ڈیلی ویجز ملازمین کے حق میں بڑا فیصلہ

لاہور ہائیکورٹ نے ڈیلی ویجز، ورک چارجڈ اور کنٹیجنٹ پیڈ ملازمین کے حق میں اہم ترین فیصلہ سناتے ہوئے پنجاب کی ڈسٹرکٹ ہیلتھ اتھارٹیز کے ملازمین کو مستقل نہ کرنے کا صوبائی حکومت کا حکم غیر قانونی قرار دے کر کالعدم کر دیا ہے۔ 26 صفحات پر مشتمل تحریری فیصلے میں جسٹس خالد اسحاق نے واضح کیا کہ مسلسل 9 ماہ سے زائد مستقل نوعیت کا کام کرنے والے ڈیٹا انٹری آپریٹرز اور سینیٹری ورکرز سمیت تمام اہل ملازمین انڈسٹریل اینڈ کمرشل ایمپلائمنٹ آرڈیننس 1968 کے تحت مستقل ورکرز کے قانونی حقوق کے حقدار ہیں۔ عدالت نے قرار دیا کہ 89 روزہ بار بار تقرریاں یا خودمختار ادارے کا عذر ملازمین کو ان کے قانونی حقوق سے محروم نہیں کر سکتا، جبکہ زبانی کلامی ملازمت سے برطرفی آئین کے آرٹیکل 25 اور قانونی تقاضوں کی خلاف ورزی ہے۔