ٹک ٹاکر کی شادی کی تقریب میں بھگدڑ، ایک شخص جاں بحق، 14 زخمی

ڈسکہ روڈ پر ایک ٹک ٹاکر کی شادی کی تقریب میں انعامی قرعہ اندازی کے دوران شدید بھگدڑ مچنے کے نتیجے میں ایک شخص جاں بحق جبکہ 14 افراد زخمی ہو گئے ہیں۔

ریسکیو حکام کے مطابق یہ افسوسناک واقعہ ڈسکہ روڈ پر واقع فراز سپورٹس اسٹیڈیم میں منعقد ہونے والی ایک ٹک ٹاکر کی شادی کی تقریب کے دوران پیش آیا۔ تقریب میں انعامی قرعہ اندازی کے لیے لوگوں کا ایک بہت بڑا ہجوم جمع تھا، اور جیسے ہی ہجوم کے لیے گیٹ کھولے گئے، اچانک بھگدڑ مچ گئی جس سے لوگ ایک دوسرے کے نیچے آ گئے۔

ریسکیو حکام نے تصدیق کی ہے کہ بھگدڑ کے اس حادثے کے نتیجے میں ایک شخص موقع پر ہی جاں بحق ہو گیا، جس کی شناخت عقیل ولد بشیر ساکن بڈھا گورائیہ ڈسکہ کے نام سے ہوئی ہے، جبکہ اس واقعے میں 14 دیگر افراد شدید زخمی بھی ہوئے ہیں۔ واقعے کی اطلاع ملتے ہی ریسکیو ٹیمیں موقع پر پہنچ گئیں اور تمام زخمیوں کو فوری طور پر طبی امداد فراہم کرنے کے لیے سول ہسپتال منتقل کر دیا گیا۔