30 رکنی الیکشن ریفارمز کمیٹی کا جلد نوٹیفکیشن جاری ہوگا، تحریک انصاف نے مخالفت نہیں کی: طارق فضل چوہدری

وفاقی وزیر پارلیمانی امور ڈاکٹر طارق فضل چوہدری نے بتایا ہے کہ قومی اسمبلی سے انتخابی اصلاحاتی کمیٹی کی تشکیل کی منظوری کے بعد اسپیکر قومی اسمبلی جلد اس کا باضابطہ نوٹیفکیشن جاری کریں گے۔ مجوزہ کمیٹی 30 ارکان پر مشتمل ہوگی، جس میں قومی اسمبلی سے 20 اور سینیٹ سے 10 اراکین شامل ہوں گے اور نشستوں کی تقسیم ایوان میں جماعتوں کی عددی قوت کے مطابق کی جائے گی۔ وفاقی وزیر نے انکشاف کیا کہ ایوان میں موشن کی پیشی کے وقت تحریک انصاف نے اس کی مخالفت نہیں کی۔ انہوں نے زور دیا کہ انتخابی اصلاحات کسی ایک جماعت کا نہیں بلکہ جمہوری نظام کی مضبوطی کا مشترکہ قومی معاملہ ہے، اور حکومت اپوزیشن سمیت تمام پارلیمانی جماعتوں کی مثبت و تعمیری تجاویز کو شاملِ عمل لا کر ایک شفاف اور قابلِ اعتماد انتخابی نظام تشکیل دے گی۔