اسرائیلی انتخابات: ابتدائی نتائج میں نیتن یاہو اتحاد کی برتری، اکثریت سے دور

اسرائیل میں ہونے والے عام انتخابات کے ابتدائی غیر حتمی نتائج کے مطابق وزیراعظم بنجمن نیتن یاہو کے اتحاد کو برتری تو حاصل ہو گئی ہے، تاہم وہ پارلیمنٹ میں حکومت قائم کرنے کے لیے درکار مطلوبہ اکثریت حاصل کرنے کی پوزیشن میں نہیں دکھائی دے رہے۔

اسرائیلی میڈیا کی رپورٹس کے مطابق ملک بھر میں ووٹوں کی گنتی کا عمل تاحال جاری ہے اور اب تک 27 لاکھ سے زائد یعنی مجموعی ڈالے گئے ووٹوں کے تقریباً 57 فیصد کی گنتی مکمل کی جا چکی ہے۔ سامنے آنے والے ابتدائی نتائج کے مطابق نیتن یاہو کے حامی اتحاد کو پارلیمنٹ میں 56 نشستوں پر برتری حاصل ہے، جبکہ ان کے مقابلے میں اپوزیشن کے آئزن کوٹ اتحاد کو 49 نشستوں پر برتری حاصل ہے۔ مزید تفصیلات کے مطابق نیتن یاہو کی اپنی جماعت اس اتحاد سے الگ ہو کر 28 نشستوں پر آگے ہے، جبکہ اپوزیشن کی جماعت ’یاشر‘ اکیلے 21 نشستوں پر برتری رکھتی ہے، اس کے علاوہ مختلف اسرائیلی عرب سیاسی جماعتیں بھی اب تک 15 نشستوں پر آگے ہیں۔

واضح رہے کہ اسرائیلی پارلیمنٹ یعنی ’کُنیسٹ‘ (Knesset) میں کسی بھی جماعت یا اتحاد کو حکومت بنانے کے لیے کل 120 میں سے کم از کم 61 نشستیں حاصل کرنا لازمی ہوتی ہیں، تاہم موجودہ ابتدائی نتائج کے تحت نہ تو نیتن یاہو کا اتحاد اور نہ ہی اپوزیشن کا آئزن کوٹ اتحاد مطلوبہ اکثریت کے ہندسے تک پہنچ سکا ہے۔ انتخابی حکام کا کہنا ہے کہ یہ نتائج فی الحال ووٹوں کی جاری گنتی پر مبنی ہیں، اور تمام بیلٹس کی گنتی مکمل ہونے کے بعد حتمی نتائج میں نشستوں کی تعداد میں ردوبدل متوقع ہے۔