اردن کے فضائی حملے، شام نے سرحدی گزرگاہ بند کر دی

اردن کی جانب سے کیے جانے والے فضائی حملوں کے بعد پیدا ہونے والی کشیدہ سکیورٹی صورتحال کے پیش نظر شام نے دونوں ممالک کے درمیان واقع اہم ‘نصیب’ سرحدی گزرگاہ کو مسافروں اور تجارتی سامان کی آمدورفت کے لیے عارضی طور پر بند کر دیا ہے۔

عالمی میڈیا کی رپورٹس کے مطابق شام کی جنرل اتھارٹی برائے سرحدی امور و کسٹمز نے سوشل میڈیا پلیٹ فارم ‘ایکس’ پر جاری ایک بیان میں تصدیق کی ہے کہ صوبہ درعا کی موجودہ سکیورٹی صورتحال کے باعث سرحدی گزرگاہ کو بند کرنے کا فیصلہ کیا گیا ہے۔ بیان میں کہا گیا ہے کہ مسافروں اور سرحدی عملے کی جان و مال کی مکمل حفاظت کو یقینی بنانے کے لیے دونوں سمتوں میں ٹریفک اور تجارتی نقل و حرکت معطل کی گئی ہے۔ اس سے قبل شامی وزارتِ خارجہ نے اپنے ایک بیان میں بتایا کہ انہوں نے اردن کو اس فیصلے سے باضابطہ طور پر آگاہ کر دیا ہے، جبکہ وزارت نے اردن کی جانب سے شامی سرزمین پر فوجی کارروائیوں سے قبل پیشگی رابطہ نہ کرنے پر شدید اعتراض کرتے ہوئے درعا میں ہونے والے فضائی حملوں کے نتیجے میں شہریوں کی ہلاکتوں پر گہرے دکھ اور افسوس کا اظہار کیا۔

واضح رہے کہ اردن کی فضائیہ نے 26 اکتوبر کو جنوبی شام میں فضائی حملے کیے تھے، جن میں مبینہ طور پر ان انتہا پسند گروہوں کو نشانہ بنایا گیا جو اردن کے صوبہ الکرک میں واقع ‘سینٹ جارج آرتھوڈوکس چرچ’ پر ہونے والے دہشت گرد حملے میں ملوث بتائے جاتے ہیں۔ اردن کی وزارتِ صحت کے مطابق 23 اکتوبر کو چرچ پر ہونے والے اس ہلاکت خیز دہشت گرد حملے میں 9 افراد جاں بحق اور 34 زخمی ہوئے تھے۔