چین نے بچوں کے تحفظ کیلئے مؤثر طریقہ تنازعات اور تشدد کا خاتمہ ناگزیر قرار دیدیا

چین نے بچوں کے مؤثر تحفظ کے لیے دنیا بھر میں جاری مسلح تنازعات اور تشدد کے فوری خاتمے کو ناگزیر قرار دیتے ہوئے تمام فریقین سے پرزور مطالبہ کیا ہے کہ وہ معصوم بچوں کی جانوں کو محفوظ بنانے کے لیے سنجیدہ اقدامات کریں۔

عالمی میڈیا کی رپورٹس کے مطابق اقوام متحدہ میں چین کے مستقل مندوب فو کونگ نے سلامتی کونسل کے اجلاس سے خطاب کرتے ہوئے کہا کہ تمام فریقین کو تنازعات کے دوران اقوام متحدہ کے منشور کے اصولوں کی سختی سے پابندی کرنا ہوگی، فوری جنگ بندی کی جائے، بین الاقوامی قانون کے تحت اپنی ذمہ داریاں پوری کی جائیں اور شہریوں بالخصوص اسکولوں اور بچوں کی تنصیبات پر حملوں سے قطعي گریز کیا جائے۔ چینی مندوب کا کہنا تھا کہ پائیدار سلامتی کے حصول کے لیے اختلافات کو بات چیت اور پرامن مشاورت کے ذریعے حل کیا جانا چاہیے، جبکہ انسانی امداد میں اضافہ کر کے تنازعات سے متاثرہ علاقوں تک اس کی رسائی کو یقینی بنایا جائے تاکہ بچوں کو بروقت اشیاءِ ضرورت اور نفسیاتی معاونت فراہم کی جا سکے۔ انہوں نے مقبوضہ فلسطینی علاقوں اور ہیٹی سمیت دنیا کے دیگر حصوں میں بچوں کو درپیش سنگین خطرات پر گہری تشویش کا اظہار کرتے ہوئے بچوں کے خلاف زیادتیوں کے مرتکب عناصر کا بلاامتیاز احتساب کرنے اور اقوام متحدہ کے نگرانی کے نظام کو مزید مضبوط بنانے پر زور دیا۔