سی پیک نے معیشتوں کو جوڑا، معلوماتی راہداری عوام کو قریب لائےگی: عطا تارڑ

وفاقی وزیرِ اطلاعات و نشریات عطا اللہ تارڑ نے اسلام آباد میں ‘چین پاکستان انفارمیشن کوریڈور’ کی افتتاحی تقریب سے خطاب کرتے ہوئے کہا ہے کہ ڈیجیٹل دور میں رابطہ اور معلومات کی فراہمی اصل طاقت ہے، اور جو قوم اپنی کہانی خود نہیں سناتی، اس کا بیانیہ دوسرے بناتے ہیں۔ انہوں نے کہا کہ چین پاکستان اقتصادی راہداری (سی پیک) نے دہائیوں پر محیط خیر سگالی کو عملی معاشی ترقی میں بدلا ہے؛ اگر سی پیک کے پہلے مرحلے نے دونوں ممالک کی زمینوں کو جوڑا تھا تو اب سی پیک 2.0 کا ہدف عوام کے ذہنوں کو ملانا اور باہمی اعتماد کو فروغ دینا ہے۔ عطا اللہ تارڑ نے زور دیا کہ پاک چین دوستی نسل در نسل منتقل ہونے والا اثاثہ ہے جسے میڈیا، ڈیجیٹل پلیٹ فارمز اور معلومات کے تبادلے سے مزید مستحکم کیا جائے گا۔