ایف ڈبلیو او کی کارکردگی انتہائی ناقص، ایوان مطمئن نہیں: وزیراعلیٰ بلوچستان سرفراز بگٹی

وزیراعلیٰ بلوچستان میر سرفراز بگٹی نے بلوچستان اسمبلی کے اجلاس میں خطاب کرتے ہوئے فرنٹیر ورکس آرگنائزیشن (ایف ڈبلیو او) کی کارکردگی کو شدید تنقید کا نشانہ بناتے ہوئے کہا ہے کہ صوبے میں ادارے کی کارکردگی انتہائی ناقص رہی ہے اور منتخب ایوان اس سے بالکل مطمئن نہیں۔ انہوں نے نشاندہی کی کہ ایف ڈبلیو او کو منصوبے معیاری کام اور سیکیورٹی کی وجہ سے دیے گئے، مگر آگے پیٹی ٹھیکیداروں کو کام دینے سے نتائج مایوس کن رہے۔ وزیراعلیٰ نے مزید کہا کہ بلوچ کا نام لے کر سڑکیں نہ بننے دینے اور پلوں کو اڑانے والوں کا بلوچ قوم پرستی سے کوئی تعلق نہیں اور وہ صوبے کے دشمن ہیں۔ اجلاس کے دوران نیشنل پارٹی کے پارلیمانی لیڈر ڈاکٹر عبدالمالک بلوچ نے بھی نقطہ اعتراض پر این ایچ اے اور ایف ڈبلیو او کے معطل شدہ ترقیاتی منصوبوں اور پراجیکٹ ڈائریکٹرز کی عدم موجودگی پر تشویش کا اظہار کرتے ہوئے وفاق سے معاملے اٹھانے کا مطالبہ کیا۔