بلاول بھٹو زرداری کا کشمیریوں کو حقِ خودارادیت دینے کا مطالبہ

پاکستان پیپلز پارٹی کے چیئرمین بلاول بھٹو زرداری نے یومِ سیاہ کشمیر کے موقع پر مقبوضہ کشمیر پر بھارت کے غیر قانونی اور غاصبانہ قبضے کی شدید ترین مذمت کرتے ہوئے کشمیری عوام کے لیے حقِ خودارادیت کا پرزور مطالبہ کیا ہے۔

بلاول بھٹو زرداری کا کہنا ہے کہ تقریباً آٹھ دہائیاں گزرنے کے باوجود کشمیری عوام اپنے بنیادی حقِ خودارادیت سے محروم چلے آ رہے ہیں، اور انہیں اس حق سے محروم رکھنا عالمی ضمیر اور عالمی انصاف کے تمام دعوؤں پر ایک مسلسل سوالیہ نشان ہے۔ اپنے خصوصی پیغام میں انہوں نے واضح کیا کہ مقبوضہ کشمیر محض زمین کا کوئی خطہ نہیں بلکہ لاکھوں انسانوں کی آزادی اور تشخص کا اہم ترین مسئلہ ہے، لہٰذا کشمیری عوام کی عزتِ نفس اور اپنے مستقبل کا فیصلہ خود کرنے کے بنیادی حق کو ہر صورت تسلیم کیا جانا چاہیے۔

پیپلز پارٹی کے چیئرمین نے کہا کہ یومِ سیاہ کشمیر دراصل کشمیری عوام کی منصفانہ آزادی اور حقِ خودارادیت کی غیر متزلزل حمایت کے عزم کی تجدید کا دن ہے۔ انہوں نے یاد دلایا کہ قائدِ عوام شہید ذوالفقار علی بھٹو اور شہید محترمہ بینظیر بھٹو نے مسئلہ کشمیر کو ہمیشہ پاکستان کے اصولی مؤقف اور خطے میں پائیدار امن کے تناظر میں اجاگر کیا۔ انہوں نے اس عزم کا اعادہ کیا کہ پاکستان پیپلز پارٹی کشمیری عوام کی سیاسی، سفارتی اور اخلاقی حمایت ہر سطح پر جاری رکھے گی۔

بلاول بھٹو زرداری نے اقوامِ متحدہ اور عالمی برادری پر زور دیا کہ وہ مسئلہ کشمیر اور مقبوضہ کشمیر میں جاری سنگین انسانی حقوق کی خلاف ورزیوں پر محض بیانات سے آگے بڑھیں اور مظلوم کشمیریوں کے حقوق کے تحفظ کے لیے عملی و مؤثر اقدامات کریں۔ انہوں نے مطالبہ کیا کہ اقوامِ متحدہ کی متعلقہ قراردادوں کی روشنی میں مسئلہ کشمیر کا منصفانہ حل یقینی بنایا جائے۔ آخر میں، انہوں نے کشمیری عوام کے ساتھ پاکستانی عوام کی غیر متزلزل یکجہتی کا اظہار کرتے ہوئے اس یقین کا اظہار کیا کہ کشمیریوں کی لازوال قربانیاں ضرور رنگ لائیں گی، ان کی تاریخی جدوجہدِ آزادی کامیاب ہوگی اور ایک دن سرینگر میں بھی آزادی کا سورج طلوع ہو کر رہے گا۔