اسرائیل نے مقبوضہ فلسطینی علاقوں میں جنگی جرائم اور نسل کشی کا ارتکاب کیا: اقوام متحدہ کا انکوائری کمیشن

اقوام متحدہ کے ایک آزاد انکوائری کمیشن نے اپنی نئی رپورٹ میں شدید انکشاف کیا ہے کہ اسرائیل نے مقبوضہ فلسطینی علاقوں میں جنگی جرائم، نسل کشی اور انسانیت کے خلاف جرائم (بشمول استحصال، تشدد، عصمت دری اور دیگر اقسام کے جنسی تشدد) کا ارتکاب کیا ہے، اور غزہ میں جاری نسل کشی کے دوران فلسطینی شہریوں کو جان بوجھ کر نشانہ بنایا جا رہا ہے۔

اقوام متحدہ کی جنرل اسمبلی کو پیش کی جانے والی اس رپورٹ میں بتایا گیا ہے کہ 7 اکتوبر 2023 کے بعد سے مغربی کنارے اور غزہ میں صورتحال انتہائی گھمبیر ہو چکی ہے۔ کمیشن کے مطابق مغربی کنارے میں فضائی حملوں میں ہلاکتوں میں نمایاں اضافہ ہوا ہے اور 7 اکتوبر 2023 سے 30 ستمبر 2026 کے دوران فضائی حملوں میں 254 فلسطینی ہلاک ہوئے ہیں۔ کمیشن کے سربراہ سری نواسن مرلی دھر کا کہنا ہے کہ مغربی کنارے میں فلسطینیوں کے خلاف منظم عسکری کارروائیوں اور آباد کاروں کے پرتشدد حملوں کا مقصد فلسطینیوں کو ان کی سرزمین سے بے دخل کرنا اور انہیں ناقابلِ برداشت حالات زندگی مسلط کرنا ہے۔ رپورٹ میں یہ بھی بتایا گیا ہے کہ جنوری 2025 کے بعد کی فوجی کارروائیوں کے نتیجے میں 1967 کے بعد سے مغربی کنارے میں سب سے بڑی جبری نقل مکانی ہوئی ہے، اور اگست 2026 تک 34,176 فلسطینی بے گھر ہو چکے ہیں۔ علاوہ ازیں، رپورٹ میں فلسطینی اتھارٹی کو بھی تنقید کا نشانہ بنایا گیا ہے کہ اس نے مخالف آوازوں، صحافیوں اور انسانی حقوق کے محافظوں کو نشانہ بنایا ہے۔ کمیشن نے عالمی برادری اور فریقین سے مطالبہ کیا ہے کہ اسرائیل بین الاقوامی عدالتِ انصاف کے جولائی 2024 کے مشاورتی فیصلے کی تعمیل کرے اور غیر قانونی قبضہ فوری طور پر ختم کرے۔