یمنی افواج کے 24 گھنٹے میں حوثی ملیشیا پر 1276 حملے، 382 کمانڈر و اہلکار نشانہ بنے

یمنی مسلح افواج کے ترجمان ماجد النزیلی نے انکشاف کیا ہے کہ گزشتہ 24 گھنٹوں کے دوران ملک بھر میں حوثی ملیشیا کے ٹھکانوں پر شدید نوعیت کے 1,276 حملے کیے گئے ہیں، جن میں حوثی ملیشیا کے 382 کمانڈروں اور اہلکاروں کو براہِ راست ہدف بنایا گیا۔

یمنی افواج کے ترجمان کے مطابق اس بڑی کارروائی کے دوران ایک بکتر بند گاڑی سمیت حوثیوں کی 141 گاڑیاں تباہ کر دی گئی ہیں، جبکہ حملوں میں حوثیوں کے اہم کمانڈ اینڈ کنٹرول مراکز، دفاعی تنصیبات اور عسکری کمک کو بھی نشانہ بنایا گیا۔ انہوں نے بتایا کہ تعز شہر میں متعدد اسٹریٹیجک پہاڑیوں اور اہم مقامات پر اپنی پوزیشنز کو مزید مضبوط بنا لیا گیا ہے، اس وقت تعز، الجوف، مارب اور البیضا کے محاذوں پر کارروائیاں پوری شدت سے جاری ہیں، اور المخا شہر میں حوثیوں کے ایک اہم کمانڈ اینڈ کنٹرول مرکز کو بھی خاکستر کر دیا گیا ہے۔

دوسری جانب، سعودی اتحادی افواج نے حوثیوں کی جانب سے مشرقی ریجن کی طرف داغے گئے میزائل فضا میں ہی ناکام بناتے ہوئے تباہ کر دیے ہیں۔ سعودی فوجی اتحاد کے ترجمان نے ایک بیان میں تصدیق کی ہے کہ حوثیوں نے مشرقی ریجن کی سمت تین بیلسٹک میزائل فائر کیے تھے جنہیں بروقت دفاعی نظام کے ذریعے فضا میں ہی تباہ کر دیا گیا۔ اس صورتحال کے پیشِ نظر مشرقی ریجن اور الخرج گورنریٹ میں عارضی طور پر خطرے کا الرٹ بھی جاری کیا گیا تھا جسے بعد میں حالات معمول پر آنے پر واپس لے لیا گیا۔