وزیراعظم سے امیر جماعت اسلامی حافظ نعیم الرحمان کی آج ملاقات طے

وزیراعظم شہباز شریف اور امیر جماعت اسلامی پاکستان حافظ نعیم الرحمان کے درمیان آج وزیراعظم ہاؤس میں ایک اہم ملاقات طے پا گئی ہے۔

ذرائع کے مطابق یہ ملاقات آج دوپہر کو ہوگی، جس میں جماعت اسلامی کی مذاکراتی ٹیم کے ارکان بھی شریک ہوں گے، جن میں نائب امیر جماعت اسلامی لیاقت بلوچ بھی شامل ہیں۔ حکومتی وفد میں وفاقی وزراء احسن اقبال، علی پرویز ملک اور مشیر وزیراعظم رانا ثناءاللہ کی بھی شرکت متوقع ہے۔ ملاقات کے دوران پٹرولیم مصنوعات پر عائد لیوی کے خاتمے سمیت عوامی فلاح و بہبود سے متعلق مختلف تجاویز پر تفصیلی تبادلہ خیال کیا جائے گا۔ واضح رہے کہ اس سے قبل جماعت اسلامی نے پیٹرولیم مصنوعات پر لیوی کے خلاف ایک بڑے لانگ مارچ کا اعلان کیا تھا، تاہم وزیراعظم شہباز شریف کی جانب سے باضابطہ رابطے اور ملاقات کی دعوت ملنے کے بعد جماعت اسلامی نے اپنا وہ مارچ مؤخر کر دیا تھا۔ اب اس مجوزہ ملاقات میں پٹرولیم مصنوعات کی قیمتوں میں ریلیف اور لیوی کے معاملے پر حکومت کے ممکنہ اقدامات کا جائزہ لیا جائے گا۔