بھارت کشمیریوں کے جزبہ حریت کو ختم نہیں کر سکتا: صدر، وزیراعظم آزاد کشمیر

آزاد جموں و کشمیر کے صدر ڈاکٹر محمد نجیب خان اور وزیراعظم افتخار گیلانی نے 27 اکتوبر ’یومِ سیاہ‘ کے موقع پر اپنے خصوصی پیغامات میں اس عزم کا اعادہ کیا ہے کہ بھارت اپنے تمام تر ہتھکنڈوں، جبر اور ریاستی استبداد کے باوجود کشمیریوں کے جذبہ حریت کو ہرگز ختم نہیں کر سکتا۔

صدر آزاد کشمیر ڈاکٹر نجیب خان نے اپنے پیغام میں کہا کہ 27 اکتوبر کو اہلیانِ جموں و کشمیر اور پوری پاکستانی قوم یومِ سیاہ کے طور پر مناتی ہے، کیونکہ اس دن بھارت نے مقبوضہ کشمیر میں اپنی فوجیں اتار کر ایک غاصبانہ، غیر قانونی اور غیر آئینی قبضہ کیا۔ انہوں نے کہا کہ بھارت نے مقبوضہ جموں و کشمیر کو دنیا کی سب سے بڑی جیل میں تبدیل کر دیا ہے جہاں 9 لاکھ سے زائد بھارتی فوجی نہتے کشمیریوں پر ظلم و ستم کے پہاڑ ڈھا رہے ہیں۔ صدر آزاد کشمیر نے اس بات پر زور دیا کہ مقبوضہ وادی کے عوام تنہا نہیں ہیں، بلکہ آزاد کشمیر کا ہر بچہ، ماں اور بزرگ ان کے شانہ بشانہ کھڑا ہے۔ انہوں نے اقوام متحدہ، او آئی سی اور عالمی برادری سے پرزور مطالبہ کیا کہ وہ بھارت کو مقبوضہ کشمیر میں جاری انسانی حقوق کی پامالیوں سے روکے اور کشمیریوں کو ان کا بنیادی حقِ خود ارادیت دلوانے میں اپنا فعال کردار ادا کرے۔

دوسری جانب، وزیراعظم آزاد کشمیر افتخار گیلانی نے اپنے خصوصی پیغام میں کہا کہ 27 اکتوبر 1947 ریاست جموں و کشمیر کی تاریخ کا سیاہ ترین دن ہے جب بھارت نے مقبوضہ خطے پر جببر و تشدد کے ذریعے غاصبانہ قبضہ کیا۔ انہوں نے کہا کہ مقبوضہ کشمیر کے غیور عوام نے شدید ترین بھارتی بربریت کے باوجود آزادی کی شمع کو روشن رکھا ہوا ہے اور ان کا جذبہ آزادی نسل در نسل منتقل ہو رہا ہے۔ وزیراعظم نے مقبوضہ جموں و کشمیر کے عوام کی استقامت، عزمِ صمیم اور آزادی کے لیے دی جانے والی لازوال قربانیوں کو شاندار خراجِ تحسین پیش کرتے ہوئے اس عزم کا اظہار کیا کہ بھارتی مظالم کشمیری عوام کے پختہ ارادوں کو کبھی کمزور نہیں کر سکتے۔