ایران پر حملے کی مخالفت: اسرائیلی وزیراعظم کا آرمی چیف کو برطرف کرنے کا امکان

اسرائیلی میڈیا کے مطابق، وزیراعظم بنجمن نیتن یاہو کی جانب سے انتخابات سے قبل ایران پر حملے کی مخالفت کرنے پر آرمی چیف کو عہدے سے برطرف کیے جانے کا قوی امکان ظاہر کیا جا رہا ہے۔

معروف اسرائیلی اخبار ’ہارٹز‘ کی رپورٹ کے مطابق اگر وزیراعظم نیتن یاہو آئندہ انتخابات میں دوبارہ کامیاب ہو جاتے ہیں تو وہ آرمی چیف ایال زمیر کو ان کے عہدے سے ہٹا سکتے ہیں۔ اخبار کا کہنا ہے کہ ایران پر حملے کے مبینہ منصوبے کے معاملے پر موساد کے سربراہ اور اسرائیلی آرمی چیف کے درمیان شدید اختلافات پائے جاتے ہیں؛ جہاں موساد کے سربراہ نیتن یاہو کے اس حملے کے منصوبے کی حمایت کر رہے ہیں، وہیں آرمی چیف نے انتخابات سے قبل ایران پر کسی بھی قسم کے حملے کی مخالفت کی ہے۔ رپورٹ میں مزید انکشاف کیا گیا ہے کہ موساد کے سینئر حکام نے بھی اس حملے کے درست وقت اور ملکی انتخابات پر اس کے ممکنہ منفی اثرات کے حوالے سے اپنے گہرے تحفظات کا اظہار کیا ہے۔