اردن کی جنوبی شام میں مبینہ دہشتگرد تنظیموں کے ٹھکانوں کو نشانہ بنانے کی تصدیق

اردن کی رائل ایئر فورس نے جنوبی شام میں مبینہ دہشت گرد تنظیموں کے ٹھکانوں کو نشانہ بنانے کی باضابطہ تصدیق کر دی ہے۔

اردنی فوج کے مطابق یہ فضائی کارروائی جنوبی صوبے کرک کے گاؤں حمود میں ایک چرچ پر ہونے والے وحشیانہ حملے کے متاثرین کے انتقام کے طور پر کی گئی ہے، اور اس کارروائی سے پہلے دمشق (شامی حکومت) کو بھی مکمل طور پر اعتماد میں لیا گیا تھا۔ واضح رہے کہ کرک کے گاؤں حمود میں تین مسلح افراد نے ایک چرچ پر حملہ کیا تھا، جس کے نتیجے میں 9 افراد جاں بحق جبکہ تقریباً 40 افراد شدید زخمی ہو گئے تھے۔

اردنی فوج کے مطابق ’اردنی ڈیٹرنس، حمود‘ کے نام سے منسوب یہ آپریشن اسی گاؤں کے نام پر رکھا گیا ہے جہاں چرچ کو نشانہ بنایا گیا تھا۔ فوج کے بیان میں دعویٰ کیا گیا ہے کہ اس حملے میں ملوث افراد کا تعلق دہشت گرد تنظیموں سے تھا۔ رائل ایئر فورس کے لڑاکا طیاروں نے کارروائی کے دوران دہشت گردوں کے متعدد خفیہ ٹھکانوں کو تباہ کر دیا، جس کے نتیجے میں کئی عسکریت پسند ہلاک یا زخمی ہوئے ہیں جبکہ ان کی متعدد گاڑیاں بھی ملبے کا ڈھیر بن گئی ہیں۔