امریکا اور کینیڈا کے درمیان تجارتی کشیدگی کم کرنے کیلئے اہم پیش رفت

امریکا اور کینیڈا کے درمیان تجارتی کشیدگی کو کم کرنے کے لیے ایک اہم پیش رفت سامنے آئی ہے، جہاں دونوں ممالک کینیڈین اسٹیل اور گاڑیوں کی درآمدات پر عائد امریکی محصولات میں نرمی کے ایک ممکنہ معاہدے کے لیے سنجیدہ مذاکرات کر رہے ہیں۔

عالمی خبر رساں ادارے ’رائٹرز‘ کے مطابق مذاکرات سے باخبر امریکی اور کینیڈین ذرائع کا کہنا ہے کہ یہ معاہدہ 3 نومبر کو ہونے والے وسط مدتی انتخابات سے پہلے بھی طے پا سکتا ہے، تاہم اس حوالے سے تاحال کوئی حتمی فیصلہ نہیں کیا گیا۔ واضح رہے کہ امریکا نے اس وقت کینیڈین اسٹیل پر 50 فیصد تک اور گاڑیوں پر 25 فیصد محصولات عائد کر رکھے ہیں، جبکہ صدر ڈونلڈ ٹرمپ یکم جنوری 2027 سے اسٹیل اور گاڑیوں پر محصولات کو بڑھا کر 50 فیصد تک کرنے کا اعلان بھی کر چکے ہیں۔ دوسری جانب، کینیڈا کا مؤقف ہے کہ وہ اپنے قومی مفادات کا بھرپور تحفظ کرتے ہوئے امریکا کے ساتھ باہمی فائدے پر مبنی تجارتی تعلقات کے فروغ کے لیے مذاکرات کا سلسلہ جاری رکھے گا۔