مشکلات کے باوجود کشمیری اپنے عزم، حوصلے، ثابت قدمی پر قائم ہیں: اسحاق ڈار

نائب وزیراعظم و وزیر خارجہ اسحاق ڈار نے یومِ سیاہ کشمیر کے موقع پر اپنے ایک پیغام میں کہا ہے کہ تمام تر مشکلات، جبر اور ریاستی استبداد کے باوجود مقبوضہ جموں و کشمیر کے غیور عوام اپنے عزم، بلند حوصلے اور ثابت قدمی پر پوری طرح قائم ہیں۔

نائب وزیراعظم نے کہا کہ اس پرغم موقع پر ہم 27 اکتوبر 1947ء کے سیاہ ترین واقعات کو انتہائی رنج و غم کے ساتھ یاد کرتے ہیں، جب بھارتی افواج زبردستی سری نگر میں داخل ہوئیں اور اس کے ساتھ ہی جموں و کشمیر کی تاریخ کے ایک طویل، لرزہ خیز اور المناک باب کا آغاز ہوا۔ اسحاق ڈار نے اس بات پر زور دیا کہ گزشتہ کئی دہائیوں سے مقبوضہ وادی کے عوام نے بھارتی تسلط کے تحت بے پناہ مصائب برداشت کیے ہیں، جن میں بنیادی آزادیوں پر کڑی پابندیاں، انسانی حقوق کی سنگین پامالیاں اور شدید ترین تکالیف شامل ہیں، تاہم کشمیریوں کا عزمِ استقلال آج بھی غیر متزلزل ہے۔