سعودی عرب نے حوثی ملیشیا کا ایک اور ڈرون حملہ ناکام بنا دیا

سعودی عرب کی قیادت میں قائم عسکری اتحاد نے یمن کے حوثی باغیوں کی جانب سے دارالحکومت ریاض اور مملکت کے جنوبی حصوں پر کیے جانے والے ایک اور بڑے میزائل اور ڈرون حملے کو ناکام بناتے ہوئے تمام اہداف کو فضا میں ہی تباہ کر دیا ہے۔

سعودی فوجی اتحاد کے ترجمان میجر جنرل ترکی المالکی کے مطابق، تازہ ترین حملے میں حوثی ملیشیا نے دارالحکومت ریاض اور جنوبی علاقے کو تین ڈرونز کے ذریعے نشانہ بنانے کی کوشش کی، تاہم فضائی دفاعی نظام نے بروقت کارروائی کرتے ہوئے تینوں ڈرونز کو فضا میں ہی تباہ کر دیا۔ اس سے قبل حوثیوں کی جانب سے ریاض کی طرف داغا جانے والا ایک بیلسٹک میزائل بھی کامیابی سے ناکام بنا کر تباہ کر دیا گیا تھا۔ میجر جنرل ترکی المالکی نے مزید بتایا کہ اتحادی افواج کی جانب سے بھرپور جوابی کارروائی کی گئی ہے، جس کے دوران حوثیوں کے بیلسٹک میزائل ذخیرہ کرنے والی 5 خفیہ تنصیبات اور میزائل داغنے کے 4 پلیٹ فارمز کو مکمل طور پر مسمار کر دیا گیا ہے۔