پاکستان سمیت دنیا بھر میں کشمیری بھارتی جبری قبضے کیخلاف آج یوم سیاہ منا رہے

مقبوضہ جموں و کشمیر پر بھارت کے جبری اور غیر قانونی قبضے کے خلاف لائن آف کنٹرول (LoC) کے دونوں اطراف، پاکستان بھر اور دنیا بھر میں کشمیری آج یومِ سیاہ منا رہے ہیں۔

اکتوبر 1947ء کے آخری ایام اور نومبر کے پہلے عشرے کے دوران ڈوگرہ فورسز اور ہندو بلوائیوں نے بھارتی تسلط کے خلاف آزادی کی پرامن جدوجہد کرنے والے لاکھوں بے دردی سے شہید کیا تھا۔ مقبوضہ ریاست جموں و کشمیر میں بھارتی جبر، استبداد اور ریاستی دہشت گردی کے 79 سال مکمل ہو گئے ہیں۔ بھارتی فورسز نے 1947ء میں آج ہی کے دن جموں و کشمیر پر حملہ کرکے کشمیریوں کی مرضی کے خلاف غاصبانہ قبضہ کیا تھا، اور بھارت آج بھی اپنے اسی جارحانہ طرزِ عمل پر کاربند ہے۔ سات دہائیوں سے زائد کا عرصہ گزر جانے کے باوجود بھارت نے کشمیریوں کا بنیادی حقِ خود ارادیت سلب کر رکھا ہے اور مقبوضہ وادی کو ایک مکمل فوجی چھاؤنی میں تبدیل کر رکھا ہے، جہاں کشمیریوں پر عرصہ حیات تنگ کیا جا چکا ہے۔

مقبوضہ کشمیر میں بھارتی مظالم کی طویل تاریخ کے دوران پانچ لاکھ سے زائد کشمیریوں کو شہید کیا جا چکا ہے، جبکہ صرف 1990 کی دہائی سے لے کر اب تک 97 ہزار سے زائد بے گناہ کشمیریوں کو موت کے گھاٹ اتارا گیا ہے۔ اس کے علاوہ حریت قیادت سمیت 4 ہزار سے زائد کشمیری رہنما اور کارکنان آج بھی بھارت اور مقبوضہ وادی کی مختلف جیلوں میں قید و بند کی صعوبتیں برداشت کر رہے ہیں۔