سٹیٹ بینک نے شرح سود میں 0.50 فیصد اضافہ کردیا، شرح 12 فیصد مقرر

اسٹیٹ بینک آف پاکستان کی مانیٹری پالیسی کمیٹی نے پالیسی ریٹ 50 بیسز پوائنٹس کے اضافے کے ساتھ ساڑھے 11 فیصد سے بڑھا کر 12 فیصد کرنے کا فیصلہ کیا ہے۔ گورنر اسٹیٹ بینک کے مطابق مشرقِ وسطیٰ اور ایران امریکہ کشیدگی کی وجہ سے خام تیل کی قیمتیں 100 ڈالر فی بیرل رہنے کے باعث مہنگائی اور بیرونی کھاتے پر دباؤ بڑھا ہے، جس کی بنا پر 10 میں سے 9 اراکین نے شرح سود میں اضافے کی حمایت کی۔ انہوں نے بتایا کہ پہلی سہ ماہی میں 10.9 ارب ڈالر کی ریکارڈ ترسیلاتِ زر موصول ہوئیں اور سالانہ ترسیلات 45 ارب ڈالر جبکہ برآمدات 33 ارب ڈالر تک پہنچنے کی توقع ہے، تاہم درآمدی بل 71 ارب ڈالر سے تجاوز کر سکتا ہے۔ گورنر نے مزید کہا کہ رواں مالی سال معاشی ترقی کی شرح 3.5 سے 4.5 فیصد جبکہ مہنگائی کا ہدف 7 فیصد تک رہنے کا امکان ہے، جبکہ چاول، گنے اور مکئی کی بدولت زرعی شعبے کی کارکردگی میں بہتری دیکھی گئی ہے۔