بین الاقوامی منشیات سپلائی نیٹ ورک کے اہم کارندے میاں بیوی گرفتار

ڈی آئی جی ایسٹ زون اور ایس ایس پی ایسٹ کی ہدایت پر نیو سبزی منڈی چوکی پولیس نے چاکر ہوٹل کے قریب خفیہ اطلاع پر بڑی کارروائی کرتے ہوئے بین الاقوامی منشیات سپلائی نیٹ ورک سے منسلک میاں بیوی کو گرفتار کر لیا ہے۔ پولیس ترجمان کے مطابق ملزمان علی رضا اور اس کی اہلیہ مریم سے برآمد شدہ بیگ میں 14 چپلوں میں مہارت سے چھپائی گئی منشیات ’تھرا‘ اور چرس کے دو پیکٹ برآمد ہوئے ہیں۔ ابتدائی تفتیش میں ملزمان نے انکشاف کیا ہے کہ وہ کوئٹہ سے بسوں کے ذریعے منشیات کراچی منگوا کر وصول کرتے تھے اور بعد ازاں اسے آسٹریلیا میں مقیم مرکزی سرغنہ کو بھجواتے تھے جو منشیات کی فروخت کی رقم پاکستان منتقل کرتا تھا۔ پولیس نے کنٹرول آف نارکوٹکس سبسٹینس ایکٹ کے تحت مقدمہ درج کر کے نیٹ ورک کے دیگر کارندوں کی گرفتاری کے لیے تفتیش کا آغاز کر دیا ہے۔