عوام کو ریلیف دلانے کیلئے جماعت اسلامی کی تحریک جاری رہے گی: لیاقت بلوچ

نائب امیر جماعت اسلامی پاکستان لیاقت بلوچ نے کہا ہے کہ عوام کو ریلیف دلانے اور پٹرولیم مصنوعات پر عائد بھاری ٹیکسوں کے خاتمے کے لیے ان کی تحریک جاری رہے گی۔ حکومت کے ساتھ مذاکرات کے بعد میڈیا سے گفتگو کرتے ہوئے لیاقت بلوچ نے انکشاف کیا کہ حکومت اس وقت پٹرول پر 162 روپے اور ڈیزل پر 148 روپے فی لیٹر اضافی ٹیکس وصول کر کے آئی ایم ایف کو دھوکہ اور عوام کو لوٹ رہی ہے۔ انہوں نے بتایا کہ ملتان ٹرین مارچ کے بعد وزیراعظم کی درخواست پر لانگ مارچ مؤخر کیا گیا تھا اور آج کی گفتگو کا مقصد وزیراعظم اور امیر جماعت اسلامی حافظ نعیم الرحمٰن کی حتمی ملاقات سے قبل معاملات پر اتفاقِ رائے پیدا کرنا ہے۔ Liaquat بلوچ نے واضح کیا کہ وزیراعظم سے امیر جماعت اسلامی کی ملاقات صرف ‘فوٹو شوٹ’ نہیں ہونی چاہیے بلکہ اس میں آئی پی پیز اور ٹیکسوں میں کمی سے متعلق ٹھوس عوامی فیصلے سامنے آنے چاہئیں۔