23 سال بعد پاکستانی سربراہ مملکت کا دورہ جرمنی، صدر زرداری کے اعزاز میں استقبالیہ تقریب

صدر مملکت آصف علی زرداری کے اعزاز میں برلن میں جرمن وزارت دفاع میں ایک والہانہ استقبالیہ تقریب کا انعقاد کیا گیا، جہاں انہیں مسلح افواج کی جانب سے گارڈ آف آنر پیش کیا گیا۔ جرمنی آمد پر صدر مملکت کا استقبال جرمن ہم منصب فرینک والٹر شٹائن مائر نے کیا، جبکہ تقریب میں دونوں ممالک کے قومی ترانے بجائے گئے۔ صدر زرداری جرمن صدر کی خصوصی دعوت پر یہ دورہ کر رہے ہیں، جو کہ گزشتہ 23 سال کے طویل عرصے کے بعد کسی بھی پاکستانی سربراہِ مملکت کا پہلا سرکاری دورۂ جرمنی ہونے کے باعث انتہائی اہم ترین سفارتی پیش رفت ہے۔ رواں برس پاکستان اور جرمنی اپنے سفارتی تعلقات کی 75 ویں سالگرہ بھی منا رہے ہیں۔ دورے کے دوران اعلیٰ سطح کے پاکستانی وفد کی جرمن قیادت کے ساتھ اہم ملاقاتیں ہوں گی جن میں دوطرفہ تجارتی، معاشی و سفارتی تعاون کو فروغ دینے پر تفصیلی بات چیت کی جائے گی۔