میر رضا کیس:حکومت 24 گھنٹوں میں جوڈیشل کمیشن کی سفارشات پر عمل کرے، جبران ناصر

مقتول تاجر میر رضا کے اہلِ خانہ کے وکیل جبران ناصر نے کراچی میں میڈیا سے گفتگو کرتے ہوئے جوڈیشل کمیشن کی رپورٹ کا خیرمقدم کیا ہے اور کہا ہے کہ کمیشن نے ثابت کر دیا کہ میر رضا کو قتل کیا گیا، لہٰذا اب پولیس کا خودکشی کا مؤقف ختم ہو جانا چاہیے۔ انہوں نے حکومت سے مطالبہ کیا کہ جوڈیشل کمیشن کی سفارشات کے مطابق اگلے 24 گھنٹوں کے اندر مشترکہ تحقیقاتی ٹیم (جے آئی ٹی) کی تشکیل اور تفتیشی افسران کے خلاف ایف آئی اے انکوائری کا باضابطہ نوٹیفکیشن جاری کیا جائے۔ جبران ناصر نے زور دیا کہ پولیس پر عوام کا اعتماد ختم ہو چکا ہے، اسی لیے کیس کے اصل حقائق اور قاتلوں تک پہنچنے کے لیے انٹیلی جنس بنیادوں پر غیر جانب دارانہ تحقیقات ہی واحد ذریعہ ہیں۔