اسلام آباد: سوتیلی بیٹی سے زیادتی کے ملزم کو سزائے موت، 35 لاکھ روپے جرمانہ اور ہرجانہ ادا کرنے کا حکم

اسلام آباد کی ایڈیشنل ڈسٹرکٹ اینڈ سیشن عدالت کے جج محمد سہیل نے اپنی سوتیلی بیٹی کو مسلسل ایک سال تک زیادتی کا نشانہ بنانے والے سفاک ملزم افتخار کو جرم ثابت ہونے پر سزائے موت سنا دی ہے۔ اپنے تحریری فیصلے میں عدالت نے مجرم کو 5 لاکھ روپے جرمانہ، متاثرہ لڑکی کو 10 لاکھ روپے اور زیادتی کے نتیجے میں پیدا ہونے والے بچے کی کفالت کے لیے 20 لاکھ روپے ادا کرنے کا حکم جاری کیا ہے۔ مقدمے میں پنجاب فرانزک سائنس ایجنسی کے ڈی این اے ٹیسٹ کی رپورٹ کلیدی ثبوت بنی، جس میں پیدا ہونے والے بچے کا ڈی این اے مجرم سے میچ کر گیا۔ واضح رہے کہ واقعے کا مقدمہ فروری 2025ء میں متاثرہ لڑکی کی والدہ کی مدعیت میں تھانہ شہزاد ٹاؤن میں درج کیا گیا تھا۔