2024 کے انتخابات ہمیں قبول نہیں، ملک میں دوبارہ انتخابات کروائے جائیں: مولانا فضل الرحمن

جمعیت علمائے اسلام کے سربراہ مولانا فضل الرحمن نے ایک تقریب سے خطاب کرتے ہوئے اعلان کیا ہے کہ جے یو آئی کو 2024 کے انتخابات ہرگز قبول نہیں ہیں اور پارٹی ملک میں شفاف نئے انتخابات کا مطالبہ کرتی ہے۔ انہوں نے کہا کہ ان کی جماعت نے ہمیشہ دہشت گردی کی مخالفت اور بندوق کی سیاست کی نفی کی ہے، لیکن آج بھی وہ ادارے جو سیاست میں ملوث نہ ہونے کا حلف اٹھاتے ہیں، پوری سیاست کو کنٹرول کر رہے ہیں۔ مولانا فضل الرحمن نے خارجہ پالیسی اور عالمی منظر نامے پر گفتگو کرتے ہوئے کہا کہ امریکہ کا یک قطبی نظام ختم اور چین و ایشیا معاشی مرکز بن رہے ہیں، اس لیے اسلامی دنیا کا ایک مؤثر بلاک بننا چاہیے جبکہ او آئی سی ایک غیر مؤثر ادارہ بن چکا ہے۔ انہوں نے مزید بتایا کہ جے یو آئی کی جانب سے اسلام آباد اور 26 نومبر کو سرگودھا میں اساتذہ کنونشن کا انعقاد کیا جا رہا ہے۔