روس کا تہران کے ساتھ اسٹریٹجک تعاون جاری رکھنے کا اعلان

ایرانی وزیرِ خارجہ عباس عراقچی نے واضح کیا ہے کہ آبنائے ہرمز اور خلیجی خطے میں بڑھتی ہوئی کشیدگی اور عدمِ تحفظ کا اصل ذمہ دار امریکا اور اسرائیل ہیں، جبکہ خطے کے تمام بحرانوں کے حل کے لیے فوجی طاقت کے بجائے سفارت کاری اور سیاسی ذرائع اختیار کرنا ہوں گے۔

تہران میں روسی وزیرِ خارجہ سرگئی لاوروف کے ہمراہ اہم مشترکہ پریس کانفرنس سے خطاب کرتے ہوئے عباس عراقچی نے بتایا کہ ملاقات کے دوران ایران اور روس کے مابین علاقائی سیکیورٹی، خلیجی صورتِ حال، مغربی ایشیا، یوکرین تنازع اور ایران-امریکا سفارتی مذاکرات سمیت تمام اہم امور پر تفصیلی مشاورت ہوئی۔ ایرانی وزیرِ خارجہ نے اسرائیل کی توسیع پسندانہ پالیسیوں کو روکنے، یمن و لبنان کی صورتِ حال میں بہتری اور فلسطین میں انسانی نسل کشی کی فوری بندش پر زور دیا۔

اس موقع پر روسی وزیرِ خارجہ سرگئی لاوروف نے تہران کے ساتھ تزویراتی (اسٹریٹجک) تعاون کے معاہدوں پر مکمل عمل درآمد کے عزم کا اعادہ کیا۔ انہوں نے ایران پر امریکی و اسرائیلی جارحیت کی شدید مذمت کرتے ہوئے اعلان کیا کہ روس ایران اور امریکا کے درمیان جاری بحران کے حل کے لیے سفارتی معاونت اور ثالثی فراہم کرنے کے لیے تیار ہے۔ سرگئی لاوروف نے مزید کہا کہ روس بوشہر نیوکلیئر پاور پلانٹ کی تعمیر و توسع کا کام بلا تعطل جاری رکھے گا اور عالمی فورمز پر ایران کے ساتھ تعاون کو مزید فروغ دے گا۔