جرمنی کا یہودی شخصیات کے قتل کی مبینہ سازش پر ایرانی سفیر سے سخت احتجاج

جرمنی نے ملک میں اسرائیل کی حامی اور ممتاز یہودی شخصیات کو قتل کرنے کی مبینہ سازش کے معاملے پر ایرانی سفیر کو وزارتِ خارجہ طلب کر کے شدید الفاظ میں احتجاج ریکارڈ کرایا ہے۔

عالمی خبر رساں اداروں کے مطابق جرمن وزارتِ خارجہ نے اپنے ایک جاری کردہ بیان میں بتایا کہ ایران سے وابستہ دو افراد نے جرمنی میں مقیم سرکردہ یہودی شخصیات کو نشانہ بنانے کی باقاعدہ منصوبہ بندی کی تھی، تاہم سیکورٹی اداروں کی بروقت کارروائی کے باعث اس سازش کو ناکام بنا دیا گیا۔ ہیمبرگ کی مقامی عدالت نے جمعرات کے روز ڈنمارک اور افغانستان سے تعلق رکھنے والے دو شہریوں کو جرمن-اسرائیلی سوسائٹی کے سربراہ اور یہودی برادری کی مرکزی تنظیم کے قائد کو نشانہ بنانے کے جرم میں سزائیں سنائیں۔

جرمن استغاثہ کے مطابق ڈنمارک کے شہری علی ایس کو ایران کی پاسدارانِ انقلاب کی بیرونِ ملک کارروائیوں کے ذمہ دار پاسدارانِ انقلاب القدس فورس سے براہِ راست ہدایات ملتی تھیں۔ جرمن وزارتِ خارجہ نے ایرانی سفیر پر واضح کیا کہ جرمنی اپنے آزاد اور جمہوریت پسند معاشرے میں کسی بھی غیر ملکی مداخلت یا دھمکی کو ہرگز برداشت نہیں کرے گا اور دنیا بھر میں یہودیوں کے حقوق اور ان کے دفاع کے لیے آواز اٹھانے والوں کا تحفظ یقینی بنایا جائے گا۔