ایران سے معاہدے میں تمام فریقین کے خدشات دور کرنا ضروری ہیں: قطر

قطری وزارتِ خارجہ نے خطے کی موجودہ جیو پولیٹیکل صورتِ حال پر اہم بیان جاری کرتے ہوئے کہا ہے کہ ایران کے ساتھ کسی بھی پائیدار معاہدے اور امن کی بحالی کے لیے تمام متعلقہ فریقین کے امن و امان کے خدشات کو دور کرنا انتہائی ضروری ہے۔

قطری وزارتِ خارجہ نے اپنے ایک جاری کردہ بیان میں زور دیا کہ مشرقِ وسطیٰ کو اس وقت ایک نئے جامع سیکیورٹی نظام کی اشد ضرورت ہے جو تمام ممالک کے تحفظ کا ضامن ہو۔ قطر نے اس بات کی بھی وضاحت اور تردید کی کہ دوحہ میں واقع امریکی فوجی اڈہ ایران کے خلاف کسی بھی قسم کے حملوں یا کارروائیوں کے لیے استعمال نہیں ہوا۔

ترجمان قطری وزارتِ خارجہ کے مطابق خلیجی ممالک کو نشانہ بنانے کی پالیسی کے پیچھے ایران کی غلط حکمت عملی کارفرما ہے، جبکہ انہوں نے واضح کیا کہ سعودی عرب پر حوثی باغیوں کے متواتر حملوں کا بھی کوئی جواز نہیں بنتا۔ بیان میں مزید بتایا گیا کہ خطے میں استحکام برقرار رکھنے اور کشیدگی کم کرنے کے لیے تمام خلیجی ممالک کے درمیان ہر سطح پر سفارتی اور سیکیورٹی رابطے مسلسل جاری ہیں۔