پرامن یورپی شہریوں کیلئے روس کے دروازے بند نہیں ہونگے: ماریہ زخارووا

روسی وزارتِ خارجہ کی ترجمان ماریہ زخارووا (Maria Zakharova) نے واضح کیا ہے کہ یورپی یونین کی روس مخالف اور امتیازی پالیسیوں کے باوجود، ماسکو پرامن سوچ رکھنے والے عام یورپی شہریوں کے روس میں داخلے پر کسی قسم کی پابندی عائد کرنے کا کوئی ارادہ نہیں رکھتا۔

ماسکو میں میڈیا بریفنگ کے دوران ماریہ زخارووا نے کہا کہ روس یورپی حکمرانوں کی پالیسیوں کا بدلہ یورپ کے عام شہریوں کو نشانہ بنا کر نہیں لے گا۔ انہوں نے بتایا کہ یورپی ممالک میں عام شہریوں کی جانب سے روسی زبان اور تعلیمی اداروں میں دلچسپی بڑھ رہی ہے، اور رواں سال کی پہلی ششماہی کے دوران مختلف ممالک میں قائم 2,000 سے زائد یورپی شہریوں نے بیرونِ ملک قائم روسی مراکز سے روسی زبان کے کورسز مکمل کیے ہیں۔

روس اور یورپی یونین کے درمیان انرجی پارٹنرشپ پر بات کرتے ہوئے ماریہ زخارووا نے کہا کہ برسلز کے موجودہ منفی رویے اور سیاسی محاذ آرائی کو دیکھتے ہوئے مستقبل قریب میں روس اور یورپی یونین کے درمیان مکمل توانائی تعاون (Energy Cooperation) کی بحالی کے امکانات انتہائی محدود ہیں، کیونکہ یورپی یونین کی موجودہ قیادت باہمی فائدے پر مبنی تعلقات کے بجائے تصادم کی پالیسی پر گامزن ہے۔