ٹرمپ نے ایران کیخلاف کوئی اقدام کیا تو خطے کو ناقابل تلافی نقصان پہنچے گا: ابراہیم عزیزی

ایران کی مجلسِ شوریٰ کی قومی سلامتی و خارجہ پالیسی کمیشن کے چیئرمین ابراہیم عزیزی نے امریکی صدر ڈونلڈ ٹرمپ کو سخت تنبیہ کرتے ہوئے کہا ہے کہ اگر امریکی انتظامیہ نے ایران کے خلاف کسی قسم کا ملٹری اقدام یا اشتعال انگیزی کی تو پورا خطہ ناقابلِ تلافی تباہی سے دوچار ہو جائے گا۔

اپنے بیان میں ابراہیم عزیزی نے واضح کیا کہ امریکی صدر ڈونلڈ ٹرمپ کو یہ بات اچھی طرح سمجھ لینی چاہیے کہ وہ ایران کی ملکی سلامتی اور خودمختاری کے خلاف کوئی غلط قدم نہ اٹھائیں، بصورتِ دیگر کسی بھی غلط اندازے (Miscalculation) کا نتیجہ پورے خطے کے لیے انتہائی شدید اور ہولناک نکلے گا۔

ایرانی قومی سلامتی کمیشن کے سربراہ نے مزید کہا کہ ابھی تک دنیا میں ایسا کوئی پیدا نہیں ہوا جو ہماری عظیم قوم کے خلاف بم یا فوجی طاقت استعمال کرنے کی جرات کر سکے۔ انہوں نے امریکی دھمکیوں کے ردِعمل میں کہا کہ ایران کو ڈرانے یا دھمکانے کے لیے نام نہاد “مدر آف آل بم” (Mother of All Bombs) کے استعمال کا سوچنے کی بھی کوئی ہمت نہیں کر سکتا اور ایرانی افواج ہر قسم کی پیش قدمی کا منہ توڑ جواب دینے کے لیے مکمل تیار ہیں۔