ریلوے کوچز کے پرزوں کی بروقت خریداری نہ ہونے پر وفاقی وزیر برہم، انکوائری کا حکم

وفاقی وزیرِ ریلوے محمد حنیف عباسی نے مسافر کوچز کے ضروری پرزہ جات کی بروقت خریداری میں تاخیر اور سستی پر سخت برہمی کا اظہار کرتے ہوئے معاملے کی اعلیٰ سطح کی تحقیقات کا حکم دے دیا ہے۔

پاکستان ریلویز کے اعلیٰ انتظامی اجلاس کی صدارت کرتے ہوئے وفاقی وزیر کے سامنے انکشاف ہوا کہ سی ای او کی باضابطہ منظوری کے باوجود حکومت سے حکومت (G2G) کی بنیاد پر ضروری پرزوں کی بروقت خریداری میں رکاوٹ ڈالی گئی۔ اس پر سخت ایکشن لیتے ہوئے حنیف عباسی نے چیئرمین ریلوے کو ہدایت کی کہ سرکاری کاموں میں رکاوٹ پیدا کرنے والے ذمہ داروں کا تعیّن کرنے کے لیے فوری انکوائری قائم کی جائے۔

اجلاس میں بریفنگ دیتے ہوئے بتایا گیا کہ پاکستان ریلویز نے 1,326 مسافر کوچز کا ہیلتھ اینالیسز مکمل کر لیا ہے اور ریلوے کے نظام سے غیر فعال یا ڈمی کوچز کو مکمل طور پر نکال دیا گیا ہے۔ وزیر ریلوے نے واضح کیا کہ کسی بھی ڈمی کوچ کو دوبارہ سسٹم میں شامل کرنے کی صورت میں سخت سزائیں دی جائیں گی۔ اس کے علاوہ اجلاس میں ریلوے کی جرمن کوچز کی ریفربشمنٹ (مرمت و جدید کاری) کا فیصلہ بھی کیا گیا۔