امریکا ایران جنگ سے عراق کو 60 ارب ڈالر کا نقصان ہوا

مشرقِ وسطیٰ میں امریکہ اور ایران کے درمیان جاری عسکری کشیدگی اور جنگ کے باعث عراق کو تقریباً 60 ارب ڈالر کا بھاری معاشی نقصان برداشت کرنا پڑا ہے، جس کے نتیجے میں تیل کی برآمدات میں کمی، زرمبادلہ کے ذخائر میں شدید گراوٹ اور افراطِ زر نے ملکی معیشت کو بحران سے دوچار کر دیا ہے۔

عراقی وزیرِ خارجہ فواد حسین نے روم میں اطالوی ہم منصب سے ملاقات کے دوران بتایاکہ عراق کی معیشت کا 90 فیصد سے زائد انحصار خام تیل کی فروخت پر ہے۔ عراقی وزارتِ تیل کے اعداد و شمار کے مطابق ستمبر کے دوران ملکی تیل کی برآمدات گھٹ کر یومیہ 26 لاکھ بیرل کی سطح پر آ گئیں، جس سے حکومت کے لیے سرکاری ملازمین کی تنخواہوں اور پنشن کی ادائیگی بھی مشکل ہو گئی ہے۔ معاشی مشکلات کے باعث عراقی مرکزی بینک کے زرمبادلہ کے ذخائر میں 20 ارب ڈالر کی کمی ریکارڈ کی گئی ہے۔

سنگین معاشی دباؤ سے نمٹنے کے لیے عراقی مرکزی بینک نے تین سال سے زائد عرصے میں پہلی بار امریکی ڈالر کے مقابلے میں عراقی دینار کی قدر میں کمی (Devaluation) کی ہے۔ عراقی حکام کے مطابق موجودہ معاشی دھچکے کو مدنظر رکھتے ہوئے حکومت نے 2037ء تک غیر ملکی تیل پر معیشت کا انحصار کم کر کے غیر نفتی آمدنی کا حصہ 10 فیصد سے بڑھا کر 45 فیصد کرنے کا طویل المدتی ہدف مقرر کیا ہے۔